Shtëpia / Ekonomia / Tregu i sigurimeve të automjeteve, KLSH: Ka tiparet e një oligopoli

Tregu i sigurimeve të automjeteve, KLSH: Ka tiparet e një oligopoli

Prej rreth dy vitesh ka një qëndrueshmëri lidhur me primet e sigurimit për mjetet motorike por këto prime pak ndryshim kanë nga kompania në kompani edhe pse numërohen më shumë se 10 të tilla në treg. Më herët tipikja e këtij tregu ishte lëvizja e njëkohshme e primeve dhe me të njëjtat marzhe. Për Kontrollin e Lartë të Shtetit sot ky treg ka sërish tiparet e një oligopoli dhe Autoriteti i Konkurrencës ka dështuar në bashkëpunimin me Autoritetin e Mbikëqyrjes Financiare për të ndryshuar këtë situatë. Në një raport të fundit të KLSH për performancën e AMF vihet theksi në një sërë problematikash ndër të cilat edhe kjo e situatës në treg.

“Në ushtrimin e kompetencave të veta sa i përket mbikëqyrjes së kompanive të sigurimit, AMF, në raste të caktuara, nuk ka vepruar gjithmonë në përputhje të plotë me ligjin duke mos marrë masat sanksionuese përkatëse, në shumën 27.400.000 lekë (gjoba të pavendosura). Autoriteti i Konkurrencës ka dështuar në bashkëpunimin me AMF-në për sigurimin e një konkurrence të lirë dhe të ndershme në tregun e sigurimeve dhe ky treg shfaq tiparet e një oligopoli” thuhet në raport.

KLSH nënvizon se përgjatë viteve 2015-2017 AMF ka qenë pjesërisht efektiv në përmbushjen e misionit institucional si rregullues dhe mbikëqyrës i tregut të sigurimeve. “Problematikat historike të AMF-së e të këtij tregu, administrimi nga strukturat drejtuese, si dhe vendim-marrja e Bordit, kanë cenuar mirëfunksionimin e vetë tregut, transparencën dhe mbrojtjen e konsumatorit. Pavarësisht vullnetit dhe punës së mirë të drejtuesit aktual të AMF-së, përpjekjet për të arritur objektivat emergjente dhe strategjike të paracaktuara duhet të intensifikohen” vijon dokumenti.

Në finale raporti ndalet edhe tek “Thembra e Akilit” në këtë treg që lidhet me Fondin e Kompensimit dhe funksionimin e Byrosë Shqiptare të Sigurimit. Kjo e fundit sipas KLSH nuk ka përmbushur funksionin e vet dëmshpërblyes dhe mbikëqyrja e AMF-së ndaj saj nuk ka arritur pritshmërinë.

“Fondi i Kompensimit, edhe pse ka treguar shenja rimëkëmbjeje nga ngërçi vetëm vitin e fundit, mbart ende 277.056.933 lekë pagesa dëmesh ose rreth 25% nga shlyerja e plotë e tij” thuhet në raport.

KLSH nënvizon se lidhur me detyrimet e pashpërndara të vitit 2018 u la afat deri në janar 2019 për të mbyllur detyrat ashtu sikurse kishte përcaktuar AMF në vendimin e vet lidhur me Fondin e Kompensimit./Monitor.al

Shiko dhe këto

Ligji i ri/ Sigurimi i automjeteve dhe aksidentet, tarifat e ndryshme: Ja sa bëhen!

Qeveria ka gati projektligjin të ri për sigurimet, i cili shtrëngon edhe më shumë mjetet …