Shtëpia / Politika / Refuzoi ftesën e Ramës, dirigjenti kërkesë Majkos: Anulo Samitin e Diasporës

Refuzoi ftesën e Ramës, dirigjenti kërkesë Majkos: Anulo Samitin e Diasporës

Dirigjenti shqiptar që jeton në Kanada, Bujar Llapaj i ka bërë thirrje ministrit të Diasporës, Pandeli Majko, që të anulojë samitin e planifikuar për t’u zhvilluar në datat 28 shkurt-2 mars.

Duke refuzuar ftesën që i ka mbërritur nga Tirana, Llapaj rendit gjashtë arsye përse nuk do i bashkohet Samitit të Diasporës. Një prej arsyeve është fakti që për këtë organizim do të shpenzohen 66 milionë lekë (660 milionë lekë të vjetra), të cilat do u hiqen shqiptarëve të varfër, thotë dirigjenti, që nuk kanë bukë për fëmijët e tyre.

Reagimi i plotë Bujar Llapaj:

Ministrit të Shtetit për Diasporën Z. Pandeli Majko

I nderuar zoti Ministër,

Para disa ditësh nga zyra Juaj mora një email-ftesë për Samitin II të Diasporës.

Fillimisht desha T’ju falënderoj për ftesën dhe duke patur një konsideratë të veçantë për Ju personalisht si një politikan i pa përfolur për korrupsion, si një patriot me zemër, si një zë i pavarur edhe kundër të gjithëve si në rastin e votimit të ligjit për shembjen e Teatrit Kombëtar , do të desha publikisht T’ju shpreh arsyet përse unë refuzoj të marr pjesë në atë Samit,shqip: mbledhje apo kuvend të Diasporës.

Normalisht në Samitin II duhej të bëhej një analizë se çfarë është realizuar nga objektivat e përcaktuara nga Samiti I, në qoftë se ka patur të tilla dhe jo vetëm fotografi me “udhëheqësit” apo çmallje dhe lot mallëngjimi për Mëmëdheun.

Edhe pse në Këshillin e Diasporës mund të jenë njerëz vërtetë të shquar në fushën e tyre dhe aktivistë në komunitet, përzgjedhja e tyre nga qeveria e komprometon qëllimin dhe procesin dhe nuk përputhet me normat demokratike që zbatojnë vetë shoqatat e shqiptarëve në mërgim.

Harxhimi i 66 milion lekë (të reja) nga paratë e taksapaguesve shqiptarë për këtë aktivitet 3 ditor, mua më duket e tepërt, jo normale për një shtet me 1001 probleme ekonomike, ku shumë familje shqiptare vuajnë mungesën e bukës për fëmijët, dhe do të ishte cinike dhe kriminale që unë apo shumë të tjerë të vijmë dhe kapardisemi nëpër tribuna dhe ekrane.

Është hipokrizi dhe cinizëm të ftosh dhe harxhosh miliona për të marrë “mendjen” e Diasporës kur politika shqiptare në përgjithësi dhe ajo ‘Rilindase” në rastin konkret, nuk kanë nevojë për mendje,por për demagogë dhe servila. Do ta quaja të sinqertë këtë kur “udhëheqësit” të dëgjonin dhe shfrytëzonin së pari potencialet intelektuale që jetojnë në Shqipëri. Unë nuk do të pranoja të bëhesha pjesë e një maskarade të tillë.

Askush nga politikanët shqiptarë nuk mund të marrë rolin e Skënderbeut dhe të imitojë Kuvendin e tij të Lezhës. 6 shekuj përpara Skënderbeu i bashkoi shqiptarët nën një flamur, nën një ideal, kurse stërnipat e tij për gati një shekull kanë sunduar popullin e vet me mënyrat nga më barbaret, e kanë përçarë si kurrë më parë për pushtetin e tyre personal, ca në emër të “antikomunizmit”, të tjerë për “rilindjen”. Në krizën e gjithanshme që gjendet tani Shqipëria pjesëmarrja në këtë Samit është thjesht t’i shërbesh si mbështetje “Rilindjes”, jo Shqipërisë.

Vetë Diaspora, përpara se një Samiti, kërkon të bëhet realisht ndikuese dhe kontribuuese në proceset demokratike të Shqipërisë duke ju siguruar e drejta e VOTES, themeli i të drejtës qytetare. Kur?

I nderuar zoti Majko, Ju drejtohem Juve si një figurë politike e pa kompromentuar jo vetëm e PS-së: do të ishte në nderin dhe respektin e Diasporës dhe Tuajin personal që ta anuloni këtë Samit.

Duke gjykuar që “Rilindja” është shndërruar në një sekt politiko-ekonomik që nuk përfaqëson jo vetëm shqiptarët dhe hallet e tyre, por as PS-në,do të doja që e Ju, qoftë dhe i vetëm,të mbeteni tek idealistët e Partisë Socialiste!

Me respekt dhe konsideratë të veçantë,

Bujar Llapaj,

Vankuver, Kanada

Politiko.al

Shiko dhe këto

FOTO: “Ia derdh plumbin në gojë nëse Berisha tradhëton Amerikën…” Disa detaje nga historia e Berishës, Hajdarit dhe Kadaresë në SHBA në 1991

  Robert Papa ishte gazetar i njohur afër PD në vitet ’90. Në një rrëfim …