Shtëpia / Sport / Kukësi mposht Kamzën, Kastrioti merr një pikë ndaj Laçit

Kukësi mposht Kamzën, Kastrioti merr një pikë ndaj Laçit

Pas dy humbjeve radhazi, Kukësi arriti të rikthehet te fitorja, pasi mposhti me jo pak vuajtje Kamzën e vendit të fundit , me rezultatin final 3-2, në sfidën e zhvilluar në stadiumin “Elbasan Arena”.

Verilindorët kaluan në avantazh që në minutën e 8’ me anë të sulmuesit Vasil Shkurtaj dhe u duk se çdo gjë do të ishte e lehtë për ta, por Kamza nuk u dorëzua dhe riktheu baraspeshën në minutën e 41-të me anë të Fukuit, pas një pasigurie të portierit Frashëri.

Në pjesën e dytë Cungu hodhi në fushë Valdet Ramën dhe Eduart Rrocën, të cilën njëri në minutën e 48’ dhe tjetri në të 60-ën, arritën të shënojnë duke çuar rezultatin 3-1 për verilindorët.

Megjithatë Kamza nuk kishte ndërmend të dorëzohej dhe pas disa manovrave sulmuese radhazi, arriti të rikthejë baraspeshën në minutën e 76’, pas golit të shënuar nga sulmuesi argjentinas Martinena.

Kjo bëri që 15 minutat e fundit të takimit të ishin mjaft interesante dhe të luftuara nga të dy ekipet, por në fund festoi Kukësi, që u rikthye edhe njëherë në vendin e dytë, në kuotën e 41 pikëve, 8 më pak se Partizani kryesues.

Nga ana tjetër, Kamza mbetet në vendin e fundit, tashmë plot 9 pikë larg Luftëtarit të vendit të 8 dhe mbijetesa në mos e pamundur, është një mision tejet i vështirë.

Kastrioti dhe Laçi ndanë nga një pikë në përballjen mes tyre, të vlefshme për javën e 23-të të Kategorisë Superiore, që u zhvillua në stadiumin “Niko Dovana” të qytetit të Durrësit.

Në një sfidë mjaft të luftuar nga të dy skuadrat, ishte Laçi që kaloi i pari në avantazh, duke shënuar që në minutën e 10′ me anë të mbrojtësit shkodran Abdurrahman Fangaj.

Kundërpërgjigja e krutanëve erdhi në minutën e 51-të, kur Shehu arriti të mposhtë portierin Selmani dhe të rikthejë baraspeshën, rezultat ky që mbeti i pandryshuar deri në vërshëllimën e fundit të arbitrit kryesor. Me këtë barazim, Kastrioti mbetet në vendin e parafundit, por tashmë në kuotën e 19 pikëve dhe sheh që Luftëtari e Tirana t’i largohen disi.

Gazeta Shqip

Shiko dhe këto

Interi bën goditjen e parë në merkato, trajneri Conte duket i kënaqur

Ashraf Hakimi është lojtari më i ri i Interit. Marokeni sot zbriti në Milano për …